کراچی: شہر قائد کے علاقے نارتھ کراچی میں نامعلوم مسلح افراد نے فائرنگ کر کے سرکاری ادارے کے ریٹائرڈ افسر کو قتل کردیا۔
اے آر وائی نیوز کے مطابق نارتھ کراچی سیکٹرالیون اے میں فائرنگ کا واقعہ پیش آیا، جس میں ایک موٹر سائیکل پر سوار دو مسلح ملزمان نے گھر کے باہر ایک شخص کو نشانہ بنایا۔
فائرنگ کے بعد زخمی شخص کو انتہائی تشویشناک حالت میں عباسی شہید منتقل کیا گیا، جہاں وہ دوران علاج چل بسا۔پولیس کے مطابق مقتول کی شناخت مسعود علی کے نام سے ہوئی، جو سرکاری ادارے کے ریٹائرڈ افسر تھے۔
پولیس نے بتایا کہ ’نامعلوم مسلح افراد نے مسعود علی کو گھر کے باہر سر پر گولیاں مار کر قتل کیا، جائے وقوعہ سے تیس بور پستول کے پانچ خول ملے، جنہیں قبضے میں لے کر تفتیش شروع کردی‘۔
پولیس نے قتل پر ٹارگٹ کلنگ کا شبہ ظاہر کیا جبکہ مقتول کی لاش کو ضابطے کی کارروائی کے بعد اہل خانہ کے حوالے کردیا۔
