The news is by your side.

سابق سیکریٹری ایکسپورٹ زون کو ان کے گھر میں اہلیہ سمیت قتل کر دیا گیا

کراچی: شہر قائد میں سابق سیکریٹری ایکسپورٹ پروسیسنگ زون ظہور احمد کو ان کے گھر میں اہلیہ سمیت قتل کر دیا گیا۔

تفصیلات کے مطابق کراچی کے علاقے اسکیم 33 زہرا نگر میں گھر سے سابق سیکریٹری ایکسپورٹ پروسیسنگ زون ظہور احمد اور ان کی اہلیہ نگہت سلطانہ کی خون میں لت پت لاشیں ملی ہیں۔

پولیس کا کہنا ہے کہ مقتولین کو تیز دھار آلے سے گلا کاٹ کر قتل کیا گیا ہے، تاہم یہ واقعہ قتل ہے یا خود کشی، اس سلسلے میں باریک بینی سے تحقیقات کی جا رہی ہے، مقتولین کے جوان سال بیٹے کو بھی شامل تفتیش کر لیا گیا ہے۔

پولیس حکام کا کہنا ہے کہ ظہور احمد کی لاش کچن جب کہ ان کی اہلیہ کی لاش بیڈ روم سے ملی، جائے وقوعہ سے مقتولین کی مزاحمت کے شواہد نہیں ملے۔

پولیس نے آلہ قتل اور دیگر شواہد تحویل میں لے لیے ہیں، گھر میں موجود تیسرا شخص مقتولین کا نوجوان بیٹا مصطفیٰ احمد تھا جس نے پولیس کو بیان دیا ہے کہ وہ رات دیر سے گھر آ کر اپنے کمرے میں سو گیا تھا، صبح والدین کی موت کا علم ہوا۔

اہل محلہ کا کہنا ہے کہ مرنے والے میاں بیوی بہت ملنسار اور دوسروں کی مدد کرنے والے تھے، اچانک موت کی خبر سے صدمہ ہوا۔

ایس ایچ او کے مطابق کرائم سین یونٹ اور دیگر تفتیشی ادارے باریک بینی سے واقعے کی تحقیقات کر رہے ہیں۔

Comments

یہ بھی پڑھیں