کراچی: ڈکیتی کی وارداتوں میں ملوث 5 رکنی گروہ کو سرجانی ٹاؤن سے گرفتار کرلیا گیا، ملزمان ٹھکانے پر لوگوں سے چھینا گیا سامان رکھ رہے تھے۔

تفصیلات کے مطابق کراچی پولیس نے کارروائی کرتے ہوئے 5 ڈکیتوں کو گرفتار کیا ہے، ملزمان گبول گوٹھ میں چوری اور چھینے گئے سامان رکھ رہےتھے، ایس ایس پی طارق الہیٰ مستوئی نے بتایا کہ پولیس موقع پر پہنچی تو ملزمان نے فائرنگ کی۔

ایس ایس پی نے کہا کہ پولیس کی جوابی فائرنگ کے بعد 5 ملزمان گرفتار ہوگئے جبکہ 3 فرار ہونے میں کامیاب ہوگئے، ملزمان سے چھینی گئی موٹرسائیکلیں، موبائل فون اور اسلحہ برآمد کرلیا گیا ہے۔

کراچی پولیس چیف کا زمینوں پر قبضوں میں کمی کا دعویٰ

ملزمان موٹر سائیکلوں کے نمبر تبدیل کرکے فروخت کردیا کرتے تھے، ملزمان موبائل فون کو بلوچستان میں فروخت کرتے تھے۔

ایس ایس پی نے بتایا کہ گرفتار ملزمان کا گینگ کراچی سے بلوچستان تک آپریٹ کرتا ہے، گرفتار ملزمان میں انصار علی عرف جعلی پولیس اہلکار بھی شامل ہے۔