کراچی : سندھ حکومت نے نوید شیخ کو کمشنر کراچی کے عہدے سے ہٹا کر گریڈ 21کے افسر اقبال میمن کو کراچی کا نیا کمشنر مقرر کردیا۔
تفصیلات کے مطابق سندھ حکومت نے افسران کے بڑے پیمانے پر تقرریاں و تبادلے کر دیے اور اس حوالے سے نوٹیفکیشن بھی جاری کردیا ، نوٹیفکیشن میں کہا گیا ہے کہ کمشنر کراچی نوید شیخ کا تبادلہ کرکے ان کو چیئرمین سی ایم آئی ٹی مقرر کردیا۔
گریڈ 21کے افسر اقبال میمن کراچی کے نئے کمشنر مقرر کردیے گئے ہیں جبکہ اعجاز حسین بلوچ کو ممبر بورڈ آف ریونیو جوڈیشل اور گریڈ 20 کے افسر آصف جہانگیر کو سیکریٹری خزانہ تعینات کیا گیا ہے۔
نوٹیفکیشن کے مطابق عبدالرشید سولنگی سیکرٹری اطلاعات ، لئیق احمد سیکریٹری محنت اور گریڈ 20کے افسر بلال احمد سیکریٹری محکمہ سرمایہ کاری مقرر کئے گئے جبکہ سیکریٹری خزانہ حسن نقوی کا تبادلہ کرکے انھیں چیئرمین پلاننگ اینڈ ڈیولپمنٹ تعینات کیا گیا ہے۔
یاد رہے گذشتہ سال دسمبر میں سندھ حکومت نے کراچی کے کمشنراور ایڈمنسٹریٹر افتخار شلوانی کو عہدے سے ہٹا کر لئیق احمد کو کراچی کا نیا ایڈمنسٹریٹر جب کہ نوید احمد شیخ کو کمشنر کراچی تعینات کیا تھا۔
افتخار شلوانی کو محکمہ ایس این جی اے ڈی رپورٹ کرنے کی ہدایت کی گئی تھی جبکہ عبدالحلیم شیخ کو سیکریٹری ایکسائز اینڈ ٹیکسیشن کا اضافی چارج دیا، جب کہ سیکریٹری ایکسائز لئیق احمد ایڈمنسٹریٹر بلدیہ عظمیٰ کراچی تعینات کیے گئے تھے۔
