کراچی کے علاقے گلستان جوہر میں نجی مارٹ کے افتتاح پر بدنظمی اور ہنگامہ آرائی ہوئی ہے۔
اے آر وائی نیوز کے مطابق کراچی کے علاقے گلستان جوہر میں نجی مارٹ کے افتتاح کے بعد ڈنڈا بردار افراد نے دھاوا بول دیا اور توڑ پھوڑ کی، انتظامیہ کی جانب سے ہجوم دیکھ کر مال کے دروازے بند کرنے کے بعد عوام مشتعل ہوئے۔
نجی شاپنگ سینٹر کی افتتاحی تقریب کے موقع پر سیل لگائی گئی تھی۔
واقعے کے دوران پولیس غائب رہی بعدازاں مارٹ انتظامیہ کی جانب سے پولییس کو طلب کرلیا گیا ہے۔
پولیس کا کہنا ہے کہ مال انتظامیہ کی جانب سے پہلے آگاہ نہیں کیا گیا تھا کہ اس قسم کی کوئی تقریب کی جارہی ہے۔
ایس ایس پی ایسٹ ڈاکٹر فرخ رضا کا کہنا ہے کہ آج مارٹ کا افتتاح تھا، رش زیادہ ہونے کی وجہ سے مارٹ کو بند کیا گیا، مارٹ بند ہونے کی وجہ سے کچھ شرانگیز متحرک ہوئے ، پتھراؤ کی کوشش کی۔
انہوں نے بتایا کہ پولیس نے فوری رسپانس کیا، نفری موقع پر موجود ہے، مجمع کو کنٹرول کررہے ہیں، مزید نفری بھی روانہ کردی گئی ہے۔
واضح رہے کہ مال انتظامیہ کی جانب سے تقریب کی پروموشن کی گئی تھی اور سیل لگائی گئی تھی جس کے بعد لوگوں کی بڑی تعداد پہنچی اور صورتحال کنٹرول سے باہر ہوگئی۔
علاوہ ازیں جوہڑ موڑ، جوہر چورنگی اور کامران چورنگی پر ٹریفک جام ہوگیا، گاڑیوں کی قطاریں لگ گئی، شہری گھنٹوں سے سڑکوں پرمحصور ہیں۔
