کراچی کے علاقے گلستان جوہر میں ڈاکوؤں نے مزاحمت کرنے پر آن لائن رائڈر کو فائرنگ کرکے قتل کردیا۔
اے آر وائی نیوز کے مطابق افسوسناک واقعہ کراچی کے علاقے گلستان جوہر منور چورنگی کے قریب پیش آیا، مقتول آن لائن رائڈر کی شناخت فہد حسین کے نام سے ہوئی ہے جو کورنگی کا رہائشی تھا۔
مقتول منور چورنگی کے قریب کھڑا رائڈ کا انتظار کررہا تھا اس دوران موٹر سائیکل سوار ڈاکو آگئے۔
واقعے کی سی سی ٹی وی فوٹیج میں دیکھا جاسکتا ہے کہ فہد ایک مبینہ ڈاکو کو پکڑنے میں کامیاب ہوا تو دوسرے ساتھی نے فائرنگ کرکے اسے گولیاں مار دیں جس کے نتیجے میں وہ موقع پر ہی جاں بحق ہوگیا۔
پولیس حکام کا کہنا ہے کہ مقتول سے ڈکیت کچھ چھین نہ سکے لیکن شاہراہ پر پولیس کی نفری نہ ہونے کی وجہ سے اسے قتل کرکے فرار ہوگئے۔
مقتول کی لاش جناح اسپتال میں موجود ہے جبکہ اہلخانہ بھی اسپتال پہنچ گئے ہیں۔
واضح رہے کہ رواں برس شہر قائد میں ڈکیتی مزاحمت پر قتل ہونے والے افراد کی تعداد 110 تک جا پہنچی ہے۔
ذرائع کا کہنا ہے کہ پولیس حکام کی جانب سے ڈکیتی کی واردات کو چھپانے کی کوشش کی جاتی ہے اور واردات کو ذاتی دشمنی کا شاخسانہ قرار دیا جاتا ہے لیکن جب سی سی ٹی وی فوٹیج سامنے آتی ہے تو پتا چلتا ہے کہ مزاحمت پر شہری کو قتل کیا گیا ہے۔
