کراچی کے علاقے بلدیہ حب ریور روڈ پر گارڈ نے ڈکیت قرار دے کر خاتون سمیت دو افراد کو مار ڈالا۔
اے آر وائی نیوز کے مطابق ایس ایس پی کیماڑی کا بتانا ہے کہ بلدیہ حب ریور روڈ پر خاتون سمیت دو افراد کا قتل ہوا، مقتول شہری کی شناخت حنیف کے نام سے ہوئی، واقعے میں جاں بحق خاتون راہگیر معلوم ہوتی ہے۔
ایس ایس پی کا بتانا ہے کہ مقتول کے خلاف اور مقتول نے دوسروں کے خلاف کیسز کررکھے ہیں۔
پولیس حکام کا کہنا ہے کہ حنیف لین دین کے سلسلے میں نیول کالونی آیا تھا، مباحثہ ہوا تو اس نے بھاگنے کی کوشش کی، وہ جس شخص کے پاس آیا تھا اس نے چور کا شور مچادیا۔
پولیس کا بتانا ہے کہ نیول کالونی گیٹ پر موجود گارڈز نے چور کی آواز سنی اور فائرنگ کردی۔
تفتیشی حکام کا کہنا ہے کہ فائرنگ کرنے والے تینوں گارڈز کو حراست میں لے لیا گیا ہے جبکہ واقعے میں جاں بحق ہونے والی خاتون کا شوہر محفوظ رہا۔
