کراچی: شہر قائد میں کالے کالے بادلوں کی آنکھ مچولی کا سلسلہ جاری ہے، کہیں ہلکی بوندا باندی تو کہیں دھوپ مگر محکمہ موسمیات کا کہنا ہے کہ آئندہ اڑتالیس گھنٹے میں شہرمیں تیز بارش ہوگی۔
محکمہ موسمیات نے ایک بار پھر کراچی میں شدید بارش کی پیشگوئی کردی، ایسی پیش گوئی گزشتہ پندرہ روز کے دوران بھی کئی بار کی گئی تھی۔
موسم کا حال بتانے والوں کا کہنا ہے کہ کراچی میں تھر سے مون سون کا نیا سسٹم داخل ہورہا ہے، جس کی وجہ سے بارہ اور تیرہ جولائی کو بادل جم کے برسنے کا امکان ہے۔
محکمہ موسمیات نے شدید بارش کا الرٹ جاری کردیا ہے لیکن کراچی میں نالوں کی صفائی اب تک نہیں کی گئی اور شدید بارش کی صورت میں شہر کا کیا بنے گا، حکومت سندھ کو بظاہر کوئی پرواہ نہیں جبکہ ممکنہ بارشوں کے پیش نظر محکمہ صحت نے بھی الرٹ جاری کردیا، ڈاکٹرز اور پیرامیڈیکل اسٹاف کی چھٹیاں منسوخ کردی گئیں۔
محکمہ موسمیات کا کہنا ہے ملک میں آج سے مون سون بارشوں کے نئے سلسلے کا آغاز ہوگا، اسلام آباد ، خیبر پختونخوا ، سکھر ، میرپور خاص ، ژوب اور کشمیر سمیت مختلف بالائی علاقوں میں بھی تیز بارش ہوگی اور مون سون بارشوں کا سلسلہ جمعرات تک جاری رہے گا۔