کراچی کی سڑکوں پر ہیوی ٹریفک کا خونی کھیل جاری ہے ایک گھنٹے میں بچی سمیت دو افراد کو کچل کر موت کی نیند سلا دیا گیا۔
کراچی پاکستان کا سب سے بڑا شہر ہے لیکن یہاں کے شہری کی جان سب سے زیادہ سستی ہے۔ شہر قائد کے حوالے سے مشہور ہوتا جا رہا ہے کہ جو شہری چوروں، ڈاکوؤں کی گولیوں سے بچ جاتے ہیں، انہیں ٹرالر، ڈمپر یا ٹرک کچل ڈالتے ہیں۔
شہر قائد کے لیے جمعرات کا سورج خونیں صبح لے کر طلوع ہوا۔ اورنگی ٹاؤن پانچ نمبر کے علاقے میں تیز رفتار ٹرک نے موٹر سائیکل سوار کو ٹکر مار دی۔ اس حادثے کے نتیجے میں موٹر سائیکل سوار ایک شخص موقع پر ہی جاں بحق ہوگیا جب کہ دوسرا زخمی ہوگیا۔
پولیس اور ریسکیو ادارے جائے حادثہ پر پہنچ گئے جب کہ ٹرک ڈرائیور فرار ہونے میں کامیاب ہوگیا۔
ریسکیو ذرائع کے مطابق جاں بحق نوجوان کی شناخت محمد حمزہ سے ہوئی جب کہ ارسلان نامی شخص زخمی ہوا ہے۔
اس سے قبل آج علی الصباح سپر ہائی وے کے قریب ڈمپر نے 6 سالہ بچی کو کچل ڈالا۔ بچی کا تعلق بہاولپور سے ہے۔ اس کے والدین آج ہی رشتہ داروں سے ملنے کراچی آئے تھے لیکن بیٹی کی لاش لے کر اپنے آبائی شہر جائیں گے۔
گزشتہ روز بھی شارع فیصل بلوچ کالونی پر گاڑی کی ٹکر سے موٹرسائیکل سوار نشانہ بنا تھا جب کہ لیاقت آباد نمر چار میں واٹر ٹینکر کی ٹکر سے نوجوان جاں بحق ہوا۔
ریسکیو حکام کے مطابق جنوری کے ابتدائی 15 دن میں اب تک مختلف ٹریفک حادثات میں 30 سے زائد افراد اپنی جانوں سے ہاتھ دھو بیٹھے ہیں۔ حادثات واٹر ٹینکرز، ڈمپرز، کوچز، کاروں اور موٹر سائیکلوں کے ٹکرانے کے باعث ہوئے۔
