شہر قائد میں آئندہ چند دنوں میں سردی کی شدت میں کتنا اضافہ ہوگا، اس حوالے سے چیف میٹرولوجسٹ نے اہم پیشگوئی کی ہے۔
محکمہ موسمیات کے مطابق بلوچستان میں آج سے سائیبریا کی ٹھنڈی ہوائیں چلیں گی اور مختلف اضلاع میں بوندا باندی کا بھی امکان ہے جس سے ٹھنڈ کی شدت میں اضافہ ہوگا، سردی کا اثر نہ صرف کوئٹہ بلکہ کراچی کے موسم پر بھی پڑے گا۔
کراچی میں بھی سائبیریا کی ہوائیں ٹھنڈ میں اضافے کا باعث بن رہی ہیں، یہ سائبیرین ہواؤں کا ہی اثر ہے کہ پورا ملک شدید سردی کی لپیٹ میں ہے۔
اے آر وائی سے گفتگو کرتے ہوئے چیف میٹرولوجسٹ سردار سرفراز کا کہنا تھا کہ کراچی میں سائبیرین ہوائیں پہنچ رہی ہیں اس لیے رات میں اتنی زیادہ سردی ہوجاتی ہے، دن میں پھر بھی موسم بہتر رہتا ہے۔
انھوں نے بتایا کہ کراچی میں دن کے اوقات میں بھی جس دن ہوائیں تیز چلتی ہیں تو سردی ہوجاتی ہے، 13 دسمبر کو سرد ہوائیں چلی تھی، اب 24 اور 25 دسمبر کو بھی سرد ہوائیں چلنے کا امکان ہے۔
سردار سرفراز کا کہنا تھا کہ اسکردو وغیرہ میں درجہ حرات نقطہ انجماد سے بھی نیچے گیا ہے جبکہ کوئٹہ اور قلات میں بھی ایسی ہی صورتحال رہی ہے۔
انھوں نے کہا کہ دسمبر کے مقابلے میں جنوری زیادہ ٹھنڈا ہوگا، دسمبر میں درجہ حرارت ایورج سے نیچے چل رہا ہے، دسمبر میں جتنی سردی ہوتی ہے ٹمپریچر اس سے خاصہ نیچے جارہا ہے۔
