کراچی: شہر قائد کے علاقے نارتھ کراچی میں ہجوم کے ہاتھوں ڈکیت قرار دیے گئے دونوں بھائی بے گناہ نکلے جنہیں پولیس نے 24 گھنٹے حراست میں رکھنے کے بعد رہا کردیا۔
نمائندہ اے آر وائی نیوز کے مطابق ایک روز قبل کراچی کے علاقے پاؤر ہاؤس چورنگی کے قریب ہجوم نے موٹرسائیکل پر سوار دو بھائیوں کو ڈکیت قرار دے کر انہیں شدید تشدد کا نشانہ بنایا تھا۔
خواجہ اجمیر نگری کی پولیس نے موقع پر پہنچ کر دونوں افرادکو تحویل میں لیا اور پھر انہیں طبی امداد کے لیے اسپتال منتقل کیا گیا۔ پولیس نے اب سے کچھ دیر قبل دونوں بھائیوں کو بے گناہ قرار دیتے ہوئے انہیں رہا کردیا۔ پولیس حکام کے مطابق شہریار اور تیمور کے خلاف کوئی مدعی سامنے نہیں آیا۔
مزید پڑھیں: کراچی، اسٹریٹ کرمنل قرار دے کر 2 بھائیوں پرشہریوں کا تشدد
ایس ایچ او ندیم صدیقی کے مطابق دونوں بھائیوں کو چوبیس گھنٹے حراست میں رکھنے کا مقصد مدعی کا انتظار کرنا تھا مگر کوئی نہیں آیا، متاثرہ بھائیوں نے ہجوم کے خلاف تشدد کا مقدمہ درج کرانے سے انکار کردیا۔
گزشتہ روز ہی پولیس حکام نے بتایا تھا کہ دونوں بھائیوں کے قبضے سے کوئی اسلحہ برآمد نہیں ہوا جبکہ موٹرسائیکل کے کاغذات بھی موجود تھے، متاثرہ بھائیوں کا کوئی کریمنل ریکارڈ بھی موجود نہیں تھا۔
