کراچی: چیئرمین اعلیٰ ثانوی تعلیمی بورڈ کراچی سید شرف علی شاہ نے انٹرمیڈیٹ حصہ اول کے سالانہ امتحانات برائے 2024ء کے نتائج پر طلبہ کی جانب سے اٹھائے گئے تحفظات کے پیش نظر فوری طور پر انکوائری کمیٹی تشکیل دینے کا اعلان کر دیا۔
سید شرف علی شاہ نے کل بروز جمعہ 3 جنوری 2025 کو عہدہ سنبھالا اور آج سیکرٹری یونیورسٹیز اینڈ بورڈز ڈپارٹمنٹ محمد عباس بلوچ سے میٹنگ کی جس میں طلبہ کے تحفظات دور کرنے کیلیے انکوائری کمیٹی قائم کرنے کا فیصلہ کیا گیا۔
یہ بھی پڑھیں: کراچی، انٹرمیڈیٹ نتائج پر تنازع، چیئرمین بورڈ عہدے سے فارغ
کمیٹی کا مقصد نتائج کی جانچ پڑتال اور شفافیت کو یقینی بنانا ہے تاکہ طلبہ کے اعتماد کو بحال کیا جا سکے۔ کمیٹی اس تمام معاملہ کی انکوائری کر کے ایک ماہ میں طلبہ کی شکایات کا ازالہ کرے گی۔
چیئرمین انٹر بورڈ کراچی سید شرف علی شاہ نے کہا کہ طلبہ ہماری ترجیح اور مستقبل ہیں ان کی شکایات کے تدارک کیلیے ہم ہر ممکن اقدام کریں گے، طلبہ کے تحفظات دور کرنے کیلیے قائم کمیٹی امتحانی عمل کو مزید شفاف اور معیاری بنانے کیلیے مکمل غیر جانبداری سے کام کرے گی۔
انہوں نے بتایا کہ کمیٹی پرچوں کی جانچ اور نتائج کی تیاری کے عمل میں شفافیت سمیت تمام پہلوؤں کا مکمل جائزہ لے گی۔
سید شرف علی شاہ نے طلبہ اور ان کے والدین سے درخواست کی کہ وہ اپنے تحفظات اور تجاویز براہ راست انٹر بورڈ میں جمع کروائیں تاکہ کمیٹی ان کا بھی جائزہ لے سکے۔
انہوں نے ہدایت کی کہ وہ طلبہ جو اپنے نتائج سے مطمئن نہیں ہیں وہ اسکروٹنی فارم جلد از جلد بورڈ آفس میں واقع بینک بوتھ میں جمع کروا دیں۔
