کراچی کے علاقے ملیر ہالٹ صدیق گوٹھ میں لوڈشیڈنگ پر کے الیکٹرک کا مؤقف آگیا۔
ترجمان کے الیکٹرک کا کہنا ہے کہ ملیر ہالٹ کے قریب صدیق گوٹھ میں عدم ادائیگیوں کے باعث نادہندگان کی بجلی منقطع کردی گئی ہے۔
ترجمان کا کہنا ہے کہ منقطع کیے گئے نادہندگان پر مجموعی طور پر واجب الادا رقم 90 کروڑ سے تجاوز کرچکی ہے۔
کے الیکٹرک ترجمان کا کہنا ہے کہ علاقہ مکین وقت پر بلوں کی ادائیگی کو یقینی بنائیں۔
ترجمان کا کہنا ہے کہ لوڈشیڈنگ کا دورانیہ علاقے میں ہونے والی بجلی چوری اور بلوں کی بروقت ادائیگی پر منحصر ہے۔
واضح رہے کہ ملیر کالا بورڈ پر بجلی کی لوڈشیڈنگ کے خلاف علاقہ مکینوں نے احتجاج کیا جس کے باعث نیشنل ہائی وے اور اطراف کی شاہراہوں پر ٹریفک جام اور گاڑیوں کی قطاریں لگ گئیں۔
احتجاج کے باعث شاہ فیصل کالونی، کورنگی روڈ پر بھی ٹریفک کی روانی متاثر ہوئی۔
