کراچی : ایم کیو ایم کے نامزد میئر وسیم اختر نے سندھ حکومت پر الزام عائد کیا ہے کہ کراچی کا ترقیاتی بجٹ کرپشن کی نذر ہو رہا ہے۔
تفصیلات کے مطابق نامزد میئر کراچی نے پریس کانفرنس کرتے ہوئے کہا کہ اگر محکمہ موسمیات کی پیش گوئی کے مطابق بارشیں ہوگئیں تو شہر ڈوب جائے گا اور اس کی ذمہ داری سندھ حکومت پر عائد ہوگی۔
انہوں نے مزید کہا کہ 30 برس میں نالوں کی صفائی نہیں کروائی گئی بلکہ صفائی کرنے والے ٹھیکیداروں کی دو کروڑ روپے کی رقم سندھ حکومت سے گزشتہ سال منظور کروائی گئی مگر تاحال اس رقم کی ادائیگی نہیں کی گئی۔
سندھ حکومت پر تنقید کرتے ہوئے وسیم اختر نے کہا کہ جو لوگ محکمہ بلدیات چلارہے ہیں انہوں نے ڈیزاسٹر مینجمنٹ کا نام بھی نہیں سنا ہوگا، بغیر رقم کی ادائیگی کے نالے صاف نہیں ہوسکتے۔
اس موقع پر انہوں نے وزیر اعلیٰ سندھ کو پیشکش کی کہ اگر حکومت کو شہر میں انتظامات چلانے میں مشکلات یا دشواریوں کا سامنا ہے تو ہمارے منتخب اراکین شہر کی صفائی ستھرائی اور خدمت کے لیے تیار ہیں۔
