لاہور: کراچی کنگز کے مالک اور اے آر وائی ڈیجیٹل کے سی ای او سلمان اقبال کی سربراہی میں کراچی کنگز کے انٹرنیشنل کھلاڑیوں سمیت پورا اسکواڈ لاہور پہنچ گیا۔
تفصیلات کے مطابق کراچی کنگزکی ٹیم نجی ایئرلائنزکے ذریعے دبئی سے لاہور پہنچی، کھلاڑیوں کی آمد پرعلامہ اقبال انٹرنیشنل ایئرپورٹ پرسیکورٹی کے سخت انتظامات کیے گئے۔
کراچی کنگز کے غیرملکی کھلاڑیوں کو سیکورٹی حصار میں ایئرپورٹ سے نجی ہوٹل پہنچا دیا گیا۔ کراچی کنگز کے 6 غیرملکی کھلاڑی دبئی سے لاہور پہنچے ہیں جن میں جوڈین لی، روی بوپارا، کولن انگرام، ٹائمل ملز، ڈیوڈویسی اور لینڈل سیمنزشامل ہیں۔
پی ایس ایل 2018: کوئٹہ گلیڈی ایٹرز آج پشاور زلمی سے ٹکرائے گی
خیال رہے کہ پاکستان سپرلیگ کے دو ایلیمینیٹرز میچ لاہور کے قذافی اسٹیڈیم میں کھیلے جائیں گے، پہلے میچ میں دفاعی چیمپیئن پشاور زلمی اور کوئٹہ گلیڈی ایٹرز کی ٹیمیں آج مدمقابل ہوں گی اور فاتح ٹیم کل کراچی کنگز سے ٹکرائے گی۔
یاد رہے کہ پی ایس ایل کا فائنل 25 مارچ کو کراچی کے نیشنل اسٹیڈیم میں کھیلا جائے گا اورایلیمینیٹرز میچز میں جیتنے والی ٹیم اسلام آباد یونائیٹڈ کے مدمقابل ہوگی۔
