کراچی کنگز کی جانب سے پی ایس ایل کے لیے اپنے ہیڈ کوچ کا اعلان کردیا گیا۔ ٹی ٹوئنٹی ورلڈ کپ کے فاتح کوچ مقبول فرنچائز کو جوائن کریں گے۔
تفصیلات کے مطابق ٹی ٹوئنٹی ورلڈ کپ 2016 کے فاتح کوچ فل سیمنز کو کراچی کنگز کا ہیڈ کوچ مقرر کیا گیا ہے۔ فل سیمنز نے کراچی کنگز کا حصہ بننے پر خوشی کا اظہار کیا ہے۔
کراچی کنگز کے نئے ہیڈ کوچ نے فرنچائز کو جوائن کرنے پر اپنے خیالات کا اظہار کرتے ہوئے کہا کہ کراچی کنگز کا حصہ بننے پر بہت پرجوش ہوں۔
فل سیمنز نے کہا کہ ایک مربوط ری بلڈنگ پراسیس کے بعد اس سیزن میں کراچی کنگز منفرد روپ اور میچ وننگ یونٹ کی شکل میں نظر آئے گی۔
ہیڈ کوچ کراچی کنگز نے کہا کہ کراچی کنگز کی مینیجمنٹ خاص طور پر ٹیم اونر سلمان اقبال کا مشکور ہوں، انھوں نے کراچی کنگز کے ایک نئے سفر پر کام کرنے کے لیے اپنی تمام تر سپورٹ کی یقین دہانی کرائی ہے۔
کراچی کنگز ٹیم اونر سلمان اقبال کا اس موقع پر کہنا تھا کہ ہمیں فل سیمنز کو ہیڈ کوچ مقرر کرنے پر بہت خوشی ہے۔ بطور کوچ اور کھلاڑی شاندار ٹریک ریکارڈ ان کی صلاحیتوں کا منہ بولتا ثبوت ہے۔
سلمان اقبال نے مزید کہا کہ ہمیں یقین ہے کہ فل سیمنز کی کوچنگ کراچی کنگز کو مزید بلندیوں تک لے جائے گی۔
قابل ذکر بات یہ ہے کہ فل سمینز 1987 کے ورلڈ کپ میں ویسٹ انڈیز کی نمائندگی کرتے ہوئے کراچی کنگز کے ہوم گراؤںڈ نیشنل اسٹیڈیم میں کھیل چکے ہیں۔
