کراچی: شہر قائد کے علاقے کورنگی زمان ٹاؤن تین نمبر میں گزشتہ روز ایک کار سے 10 سالہ بچے کی تشدد زدہ لاش ملی تھی، پولیس نے انکشاف کیا ہے کہ بچے کو زیادتی کے بعد تشدد کر کے قتل کیا گیا ہے۔
تفصیلات کے مطابق کراچی کے علاقے زمان ٹاؤن میں کار سے ایک بچے کی لاش ملی تھی، مقتول بچہ ذہنی معزور تھا جو جمعہ کی صبح سے لا پتا تھا ، پولیس نے کار کے مالک کو حراست میں لے لیا ہے۔
ایس ایس پی کورنگی ساجد سدوزئی کا کہنا ہے کہ بچے کو زیادتی کا نشانہ بنانے کے بعد تشدد کر کے قتل کیا گیا ہے، ابتدائی میڈیکل رپورٹ میں شواہد سامنے آ گئے ہیں۔
ایس ایس پی کورنگی کے مطابق بچے کی لاش شہزاد نامی شخص کی گاڑی سے ملی تھی، بچے کی لاش پر تشدد کے نشانات موجود ہیں، پارکنگ اسٹینڈ کے چوکیدار عاصم اور کار مالک شہزاد کو حراست میں لے لیا گیا ہے، دونوں کا ڈی این اے ٹیسٹ کرایا جائے گا، جب کہ مزید تفتیش بھی جاری ہے۔
پولیس حکام کے مطابق مقتول بچے کی شناخت حسین کے نام سے ہوئی ہے، جو کورنگی کا ہی رہائشی تھا، جب کہ لواحقین کے مطابق مقتول بچہ جمعہ کی صبح سے لاپتا تھا، بچہ ذہنی معزور تھا۔
پولیس کا کہنا ہے کہ کار کے مالک شہزاد کی جانب سے ہی پولیس مددگار ون فائیو پر لاش کار میں موجود ہونے کی اطلاع دی گئی تھی۔
کار کے مالک شہزاد کے بیان کے مطابق وہ اپنی والدہ کو دوا دلوانے کے لیے کار میں سوار ہوا تو کچھ فاصلے پر جا کر پچھلی سیٹ پر لاش کا پتا چلا۔ مقتول بچے کے والد میزان کے بارے میں معلوم ہوا ہے کہ وہ رکشہ ڈرائیور ہے۔
