کراچی کے بلدیاتی انتخابات کے غیر سرکاری اور غیر حتمی نتائج آنے کا سلسلہ جاری ہے تاہم ابتدائی نتائج پر پیپلز پارٹی نے بڑا دعویٰ کر دیا ہے۔
اے آر وائی نیوز کے مطابق سندھ میں بلدیاتی انتخابات کے دوسرے مرحلے میں گزشتہ روز کراچی اور حیدرآباد ڈویژن کے 16 اضلاع میں ہونے والے الیکشن کے نتائج تاخیر کا شکار ہوگئے ہیں تاہم سندھ کی حکمران جماعت پیپلز پارٹی نے ابتدائی نتائج کے بعد بڑا دعویٰ کر دیا ہے۔
پیپلز پارٹی رہنماؤں نے دعویٰ کیا ہے کہ کراچی میں پی پی پی 80 نشستوں پر آگے ہے۔ ضلع ملیر کے 3 ٹاؤنز میں سے 23 یونین کمیٹی جیت گئے ہیں۔ ضلع جنوبی کے 2 ٹاؤنز میں 25 یونین کونسلوں میں سے 13 پر پی پی نے کامیابی حاصل کی ہے۔ ضلع کیماڑی کے 3 ٹاؤنز کی 32 مجموعی یونین کونسلوں میں سے 18 پر جیالے امیدوار جیتے ہیں۔
پیپلز پارٹی نے ضلع شرقی میں بھی 12 یونین کونسلوں پر کامیابی کا دعویٰ کیا ہے۔ سہراب گوٹھ ٹاؤن ڈسٹرکٹ ایسٹ کی 8 یوسیز میں سے 6، ضلع غربی کی 5، وسطی کی 4 اور ضلع کورنگی کی تین یونین کونسلوں میں سب سے آگے ہونے کا دعویٰ بھی سامنے آیا ہے۔
پیپلز پارٹی نے یہ بھی دعویٰ کیا ہے کہ ووٹوں کی گنتی کا عمل جاری ہے اور ہماری نشستوں میں مزید اضافہ ہوگا۔
