کراچی : شہر قائد میں اسٹریٹ کرمنلز کو یومیہ 1500 روپے میں کرائے پر اسلحہ دینے کا انکشاف سامنے آیا ، پولیس اور رینجرز نے اہم ملزم کو گرفتار کرلیا۔
تفصیلات کے مطابق رینجرز اور پولیس نے کراچی کے اسٹریٹ کرمنلز کو یومیہ 15 سو روپے میں کرایے پر اسلحہ دینے والے ڈکیت گروہ کے سرغنہ کو گرفتارکرلیا۔
کراچی میں رینجرز اور پولیس نے مشترکہ ٹارگٹڈ کارروائی کی ، کارروائی یوسف گوٹھ بلدیہ ٹاؤن میں کی گئی۔
ترجمان رینجرز نے بتایا کہ آپریشن کے دوران منظم گروہ کے سرغنہ نسیم کو گرفتار کرکے 30 بور پستول برآمد کیا۔
ترجمان کا کہنا تھا کہ گرفتار ملزم منشیات فروشی ،ڈکیتی کی وارداتوں میں ملوث ہے۔
رینجرز ترجمان نے کہا کہ ابتدائی تفتیش کے دوران ملزم نے اہم اعتراف کیا، ملزم کا گروہ کراچی کے مختلف علاقوں میں وارداتیں کرتا ہے اور شہریوں سے گن پوائنٹ پر موبائل ،نقدی اور موٹر سائیکل چھینتے ہیں۔
ملزم نے انکشاف کیا کہ جرائم پیشہ افراد کوروزانہ 1500 روپےمیں غیر قانونی اسلحہ دیتاتھا تاہم ملزم کے دیگر ساتھیوں کی گرفتاری کے لیے چھاپے مارے جا رہے ہیں۔
نذیر شاہ کراچی میں اے آر وائی نیوز سے وابستہ نمائندہ خصوصی ہیں، وہ 16 سال سے زائد عرصے سے اپنے شعبے میں مصروف عمل ہیں اور انویسٹیگیٹو نیوز بریکنگ میں مہارت رکھتے ہیں، اور کراچی کے جرائم اور پولیس نظام سے متعلق گہری سمجھ بوجھ کے حامل ہیں۔