کراچی میں بیوی کے زیور بیچ کر بیمار بیٹی کے علاج کے لیے پیسے لانے والے شخص کو ڈکیتی مزاحمت پر قتل کردیا گیا۔
اے آر وائی نیوز کے مطابق کراچی کے علاقے احسن آباد کے قریب ڈکیتی مزاحمت پر فرحان نامی شخص کو ڈاکوؤں نے قتل کردیا۔
اہلخانہ کے مطابق فرحان مالی مشکلات کا شکار تھا، بیٹی بیمار تھی تو اس کے علاج کے لیے بیوی کے زیور بیچ کر 70 سے 80 ہزار روپے لے کر آرہا تھا۔
- Advertisement -
ورثا کا کہنا تھا کہ فرحان گھر سے گیا اور کہا کہ میں آکر بیٹی کو دوائی دلاؤں گا۔
مقتول کی اہلیہ کے مطابق وہ جس وقت فرحان کو گولی لگی وہ مجھ سے فون پر بات کررہے تھے۔
پولیس کا کہنا ہے کہ جائے وقوعہ سے فرحان کا موبائل فون مل گیا ہے جبکہ مزید تفتیش جاری ہے۔
واضح رہے کہ رواں سال شہر قائد میں ڈکیتی مزاحمت پر 104 افراد کو قتل کردیا گیا جبکہ متعدد افراد زخمی کیا جاچکا ہے۔
