کراچی : پیپلز پارٹی اور سندھ کی مقامی انتظامیہ کا وفد کراچی میں نمائش چورنگی پر دھرنے میں بیٹھے منظاہرین کو منانے کیلیے پہنچ گیا۔
اے آر وائی نیوز کی رپورٹ کے مطابق وفد میں میئر کراچی مرتضیٰ وہاب، وزیر بلدیات سعید غنی، سینیٹر وقار مہدی شامل تھے پی پی اور انتظامیہ کے وفد نے نمائش چورنگی پر دھرنے پر بیٹھے ایم ڈبلیو ایم کے قائدین سے ملاقات کی۔
سندھ حکومت اور مجلس وحدت المسلین کے علمائے کرام کے درمیان مذاکرات میں ایڈیشنل آئی جی کراچی جاوید عالم اوڈھو، ڈی آئی ایسٹ، ایس ایس پی ایسٹ، ایس پی اور دیگر بھی موجود تھے۔
پی پی رہنما سینیٹر وقار مہدی نے گفتگو کرتے ہوئے کہا کہ پارہ چنار میں ہونے والے مظالم کی شدید الفاظ میں مذمت کرتے ہیں، ایم ڈبلیو ایم سے درخواست کرتے ہیں کہ دھرنے ختم کردیں۔
قبل ازیں پی پی رہنما سعید غنی نے کہا کہ پارہ چنار میں جو کچھ ہوا اس پر ہرپاکستانی افسردہ ہے، ہم ان واقعات کی شدید مذمت اور شہدا کے لواحقین سے اظہار تعزیت بھی کرتے ہیں۔
معصوم بچے اور خواتین شدید سردی میں کئی دنوں سے سڑکوں پر موجود ہیں،چاہتے ہیں تمام معاملات خیر و عافیت سے حل ہوں، کراچی کے شہریوں کی مشکلات کے پیش نظر کچھ گزارشات سامنے رکھی ہیں۔
علامہ حسن ظفر نقوی نے کہا کہ دھرنے سے متعلق حکومت سے ابھی کوئی بات طے نہیں ہوئی، حکومتی وفد سے جو بات ہوئی ہے اس سے مرکزی قیادت کو آگاہ کریں گے۔
ان کا کہنا تھا کہ ہماری کوشش ہے کہ دھرنوں سے شہریوں کو کوئی تکلیف نہ ہو، چاہتے ہیں جلد از جلد مسئلہ حل ہو اور ہم اپنے گھروں کو جائیں۔
