اسلام آباد: نیپرا نے کراچی میں حالیہ بارشوں میں کرنٹ لگنے کے باعث اموات کا سخت نوٹس لے لیا۔
تفصیلات کے مطابق نیشنل الیکٹرک پاور ریگولیٹری اتھارٹی (نیپرا) نے کراچی میں بارش کے دوران کرنٹ لگنے سے اموات کا نوٹس لے لیا۔نیپرا نے اپیل کی ہے کہ جاں بحق افراد کے لواحقین رابطہ کر کے ثبوت جمع کروائیں۔
کراچی میں مون سون کی حالیہ بارشوں کے دوران کم از کم 12 افراد کرنٹ لگنے سے جاں بحق ہوچکے ہیں۔
جماعت اسلامی کے رہنما حافظ نعیم الرحمان نے نیپرا کے نوٹس کو خوش آئند قرار دیتے ہوئے کہا کہ نیپرا ایوریج بلنگ،اووربلنگ اور لوڈشیڈنگ پر بھی ایکشن لے۔نعیم الرحمان کا مزید کہنا تھا کہ کےالیکٹرک ایک ناکام ادارہ ثابت ہوا ہے۔
یاد رہے کہ محکمہ موسمیات کے سربراہ سردار سرفراز نے 23 جولائی کو کہا تھا کہ مون سون سیزن کے تیسرے سلسلے میں 26 اور 27 جولائی کو کراچی میں گرج چمک کے ساتھ تیز بارش کی پیش گوئی کی تھی۔
سردار سرفراز احمد کا کہنا تھا کہ بارش کا اثر سمندر کی جنوب مغربی ہوا پر بھی پڑ سکتا ہے۔
