کراچی کے علاقے اورنگی ٹاؤن کی کچرا کنڈی میں الماری سے نوجوان کی تشدد زدہ لاش برآمد ہوئی ہے۔
کراچی کے علاقے اورنگی ٹاؤن میں سفاک ملزمان نے نوجوان کو تشدد کا نشانہ بنانے کے بعد لاش الماری میں بند کرکے کچرا کنڈی میں پھینک دی۔
مقتول حسن شاہ کارپینٹر اورنگی ٹاؤن سیکٹر 9 کا رہائشی اور کمسن بیٹی کا باپ تھا۔
مقتول کی والدہ کا بتانا ہے کہ بیٹا اتوار اور پیر کی درمیانی شپ لاپتا ہوا تھا جس کی لاش اورنگی گلشن بہار کی کچرا کنڈی سے ملی ہے۔
پولیس کا بتانا ہے کہ ملزمان نے حسن شاہ کی لاش کو ڈرم میں ڈال کر الماری کے اندر بند کردیا تھا۔
تفتیشی حکام نے واقعے کا مقدمہ درج کرکے ملزمان کی گرفتاری کے لیے ٹیم تشکیل دے دی ہے۔
واضح رہے کہ چند روز قبل لانڈھی شیرپاؤ کالونی میں گھر سے 2 بچوں کی ماں کی تشدد زدہ لاش ملی تھی، پولیس نے خاتون کے شوہر کو حراست میں لے کر واقعے کی تفتیش شروع کر دی تھی۔
خاتون کی شناخت 26 سالہ فاطمہ زوجہ نعمان کے نام سے کی گئی تھی، خاتون 2 بچوں کی ماں تھی جس کا آبائی تعلق صوابی سے تھا۔
پولیس حکام کا کہنا تھا کہ خاتون کا شوہر فیکٹری میں ملازمت کرتا ہے، خاتون کی لاش پوسٹ مارٹم کے لیے اسپتال منتقل کی ہے اور پوسٹ مارٹم رپورٹ میں ہی وجہ موت کا تعین ہوسکے گا۔
