شہر قائد کراچی پاکستان کا دل ہی نہیں بلکہ معاشی شہ رگ بھی ہے، یہاں چاروں صوبوں بشمول گلگت بلتستان سے تعلق رکھنے والے افراد بھی روزگار کمانے آتے ہیں۔
کراچی میں اسٹریٹ کرائمز کی وارداتوں میں خطرناک حد تک اضافہ ہوگیا ہے، اسلحہ بردار دہشت گرد پورے شہر میں دندناتے پھر رہے ہیں، یہ سفاک ملزمان اپنے مقصد کے حصول کیلئے کسی شہری کی جان جانے کی ذرا بھی نہیں پرواہ نہیں کرتے۔
تاہم اب اے آر وائی نیوز سے گفتگو کرتے ہوئے کراچی پولیس چیف خادم حسین رند نے کہا ہے کہ کراچی میں کرائم بڑھنے کی 4 بڑی وجوہات ہیں، پہلی وجہ یہ ہے کہ اس وقت شہر میں ضمانت پر رہا ملزمان بڑی تعداد میں واردات کررہے ہیں، پولیس ملزمان کو گرفتار کرتی ہے تو ان کی ضمانتیں ہوجاتی ہیں۔
کراچی پولیس چیف نے بتایا کہ ہم نے 8 ہزار ملزمان کو گرفتار کیا جس میں سے صرف 100 کو سزا ہوئی، اس کے علاقہ اسٹریٹ کرائم کی سزا 7 سال ہے لیکن ایک ملزم کو بھی 7 سال نہیں دی گئی، آدھے سے زیادہ ملزمان کو 1 سے 3 ماہ کی سزائیں ملیں کیوں کہ جیل سے آنے کے بعد ملزم کو پتہ ہوتا ہے باہر آنا بہت آسان ہے۔
کراچی پولیس چیف نے بتایا کہ دوسری وجہ منشیات کے عادی نشے کی لت پوری کرنے کیلئے واردات کرتے ہیں، تیسری وجہ یہ ہے کہ بے روزگاری بہت زیادہ بڑھنے کی وجہ سے بھی وارداتیں ہوتی ہیں، ڈالربحران کی وجہ سے 40 فیصد انڈسٹریز بند ہوگئی ہیں۔
کراچی پولیس چیف نے کہا کہ چوتھی وجہ پولیس کوبہت زیادہ معاملات میں شامل کردیا گیا ہے اس وقت صرف تراویح کے دوران 8 ہزار اہلکار تعینات ہیں جبکہ الیکشن، پی ایس ایل، پولیو سمیت ہرمہم میں پولیس مصروف ہوتی ہے۔
کراچی پولیس چیف خادم حسین رند نے مزید کہا کہ جنوری اور فروری میں کرائم ریٹ بہت زیادہ رہا لیکن اگر پچھلے سال سے موازنہ کریں تو کرائم ریٹ نیچے آیا ہے۔
واضح رہے کہ کراچی میں دو ماہ میں جرائم کی 20 ہزار سے زائد وارداتیں رپورٹ ہوئی جبکہ اسٹریٹ کرائم کی یومیہ شرح 256 سے تجاوز کر گئی اس کے علاوہ تین ماہ میں ڈاکوؤں نے 42 شہریوں کو قتل کیا۔
