کراچی: شہر قائد میں بلدیاتی الیکشن کا انعقاد پھر خطرے میں پڑتا نظر آ رہا ہے، ایک ہی دن پولنگ اور کرکٹ میچ شیڈول ہیں۔
تفصیلات کے مطابق کراچی میں پولیس سیکیورٹی کو اب دو میں سے ایک کا انتخاب کرنا ہوگا، شہر میں کرکٹ ہوگی یا الیکشن، کیوں کہ 15 جنوری کو کراچی میں پاکستان نیوزی لینڈ ون ڈے کرکٹ میچ بھی شیڈول ہے۔
15 جنوری کو ہی کراچی ڈویژن میں بلدیاتی الیکشن کے لیے پولنگ ہونا ہے، پولیس حکام پہلے بھی سندھ حکومت کو سیکیورٹی اہل کار دستیاب نہ ہونے سے متعلق آگاہ کر چکے ہیں۔
دوسری طرف نیوزی لینڈ کی ٹیم طویل عرصے بعد کرکٹ سیریز کھیلنے پاکستان آ رہی ہے، اور پولیس اہل کاروں کی بڑی تعداد پاک نیوزی لینڈ کرکٹ سیریز میں سیکیورٹی ڈیوٹی پر مامور ہوگی۔
نیوزی لینڈ کی ٹیم کے خلاف 27 دسمبر سے کراچی میں ٹیسٹ میچ شروع ہوگا، پاکستان اور نیوزی لینڈ کے درمیان تین ون ڈے میچز بھی کراچی میں ہونا ہیں۔
نیشنل اسٹیڈیم کراچی میں 11،13 اور 15 جنوری کو پاک نیوزی لینڈ ون ڈے میچز ہوں گے۔
