کراچی : ریسٹورنٹ میں سلنڈر دھماکے کے واقعے کی ابتدائی رپورٹ میں بتایا گیا ہے کہ دھماکا گیس لیکج اور انتہائی غفلت کے باعث ہوا، دھماکے کے بعد دکان میں گیس کھلی ہوئی ملی تھی۔
تفصیلات کے مطابق کراچی کے علاقے مسکن چورنگی پر ریسٹورنٹ میں سلنڈر دھماکے کے واقعے کے حوالے سے کرائم سین یونٹ اور سوئی گیس عملے نے ابتدائی رپورٹ تیار کرلی۔
تفتیشی ذرائع نے بتایا کہ دھماکے کے بعد دکان میں گیس کھلی ہوئی ملی تھی، دھماکا دکان میں مسلسل گیس جمع ہونے کی وجہ سے ہوا۔
ذرائع کا کہنا تھا کہ امکان ہےرات 11بجے معمول کےمطابق گیس لوڈ شیڈنگ ہوئی، گیس بند ہونے سے عملے نے کوکنگ کا عمل سلنڈر پر منتقل کیا اور عملہ گیس والو بند کرنا بھول گیا۔
تفتیشی ذرائع کے مطابق صبح 6 بجے گیس بحال ہوئی اور 6 بجے سےکھلے ہوئے والو سے گیس خارج ہوتی رہی اور صبح 7:30بجےگیس جمع ہونے سے دھماکا ہوا۔
یاد رہے کراچی مسکن چورنگی پر فاسٹ فوڈ کی دکان میں سلنڈر دھماکے سے دو افراد زخمی اور متعدد گاڑیاں تباہ ہوگئں تھیں۔
پولیس حکام کے مطابق دھماکے کے وقت دکان بند تھی ، واقعے میں دو راہگیر زخمی ہوئے، جن کی حالت خطرے سےباہر ہے۔
فلیٹ کے رہائشیوں کا کہنا ہے کہ متعلقہ حکام کو رہائشی عمارت میں گیس سلنڈر استعمال کے خلاف درخواست دی تھی، مگر کوئی سنوائی نہیں ہوئی ، اس سے قبل بھی 2020 میں اسی فلیٹ میں گیس دھماکے کی وجہ سے قیمتی جانیں ضائع اور متعدد افراد زخمی ہوگئے تھے۔
