کراچی: شہر قائد کے مختلف علاقوں میں رات بھر گرج چمک کے ساتھ بارش کے بعد ٹھنڈی ہوائیں بھی چل پڑی ہیں اور موسم سرد ہو گیا ہے۔
تفصیلات کے مطابق کراچی میں رات گئے تک گرج چمک کے ساتھ بارش برسنے کے بعد شہر کا موسم سرد ہو گیا، ملیر، لانڈھی، کورنگی، شاہ فیصل، قائد آباد، اورنگی، کلفٹن، صدر، اولڈ سٹی ایریا اور اطراف میں بادل جم کر برسے۔
بلدیہ، سائٹ ایریا، ناظم آباد، لیاقت آباد، نیو کراچی، سہراب گوٹھ، اور سپر ہائی وے پر بھی کہیں ہلکی کہیں تیز بارش ہوئی۔
محکمہ موسمیات نے پیش گوئی کی ہے کہ کراچی میں آج شام اور رات میں بھی بارش کا امکان ہے، شہر کا موجودہ درجہ حرارت 18 ڈگری سینٹی گریڈ ریکارڈ کیا گیا ہے، 18 کلو میٹر فی گھنٹے کی رفتار سے ہوا چل رہی ہے۔
سندھ کے دیگر شہروں ٹھٹہ، جامشورو، کوٹری، سیہون اور گرد نواح میں بھی بارش سے ٹھنڈ بڑھ گئی ہے، محکمہ موسمیات نے کراچی سمیت سندھ میں مزید بارش کی پیشگوئی کی ہے۔
بلوچستان کے علاقے گوادر، تربت، کیچ اور پسنی میں بادل خوب برسے، جس سے نشیبی علاقے زیر آب آ گئے ہیں، اور سردی کی شدت میں اضافہ ہو گیا ہے، قلات میں درجہ حرارت منفی ایک تک گر گیا ہے۔
