کراچی کی 11 مرکزی سڑکوں پرغیرقانونی رکشوں کی آمدورفت پر پابندی عائد کردی گئی ہے جس کا فوری طور پر اطلاق ہوگا۔
تفصیلات کے مطابق کراچی میں ون پلس ٹو اور ون پلس فور موٹرکیب رکشوں پر 2 ماہ کیلئے پابندی عائد کی گئی ہے، ڈی آئی جی ٹریفک کی سفارش پر 144 سی آر پی سی کے تحت یہ اقدام کیا گیا ہے، پابندی 15 اپریل سے 14 جون تک ہوگی۔
خلاف ورزی کرنے والوں پر 188 پی پی سی کے تحت ایکشن ہوگا، شارع فیصل، آئی آئی چندریگر روڈ، شہید ملت روڈ سمیت اہم شاہراہوں پر رکشوں پر پابندی ہوگی۔
غیرمجازاور خودساختہ روٹس پر چلنےوالے رکشے ٹریفک میں رکاوٹ بن رہے تھے، ون پلس فور رکشوں پرعبداللہ شاہ غازی کے مزار، اسٹيڈيم روڈ اور دیگرعلاقوں میں بھی پابندی عائد کی گئی ہے۔
کمشنر کراچی نے بتایا کہ ٹریفک پولیس کو شکایات درج کرانے اور کارروائی کا اختیار دےدیا گیا، تمام ایس ایچ اوز کو ہدایت جاری کی گئی ہے، پابندی کی خلاف ورزی پرسخت ایکشن لیا جائے، 15 اپریل سے 14 جون 2025 تک پابندی رہے گی۔
کراچی کے کمشنر کا مزید کہنا تھا کہ ٹریفک کے بہاؤ کو بہتر اور حادثات سے بچاؤ کیلئے فیصلہ کیا گیا، کمشنر نے کراچی کے رکشہ ڈرائیورز کو متبادل راستوں کا استعمال کرنے کی ہدایت کی ہے۔
موٹر سائیکل رکشہ اور لوڈر رکشہ چلانے والوں کیلیے ہیلمٹ لازمی قرار
