کراچی کے علاقے ماڈل کالونی میں لنگڑا ڈاکو شہری سے نقدی اور موبائل فون لوٹ کر فرار ہوگیا۔
اے آر وائی نیوز کے مطابق کراچی کے علاقے ماڈل کالونی شیٹ 24 کے قریب موٹر سائیکل پر سوار دو ملزمان نے شہری سے لوٹ مار کی، ملزمان ایک لاکھ 40 ہزار روپے لوٹ کر فرار ہوگئے۔
لوٹ مار کرنے والا ایک ڈاکو لنگڑا تھا جس کی سی سی ٹی وی فوٹیج بھی سامنے آگئی۔
فوٹیج میں 2 ملزمان کو شہری سے لوٹ مارتے کرتے دیکھا گیا۔
واضح رہے کہ گزشتہ روز کراچی کے علاقے فقیرا گوٹھ میں ڈاکوؤں نے مزاحمت کرنے پر حاملہ خاتون کو فائرنگ کرکے قتل کردیا تھا۔
گزشتہ رات 2 موٹر سائیکل سوار ملزمان نے فقیرا گوٹھ میں راہگیر میاں بیوی کو لوٹنے کی کوشش کی، لیکن مزاحمت پر فائرنگ سے 25 سال کی صائمہ زخمی ہو گئیں، جو بعد میں دم توڑ گئیں۔
خاتون کے شوہر عرفان نے اپنے بیان میں کہا ’’مقتولہ صائمہ حاملہ تھی جسے اسپتال لے کر جا رہا تھا، ایک موٹر سائیکل پر 2 ملزمان آئے اور لوٹ مار کرنے لگے، ملزمان نے میرا موبائل چھین لیا تھا اور اہلیہ صائمہ کا پرس چھین رہے تھے۔‘‘
غم زدہ عرفان نے بتایا ’’اہلیہ صائمہ نے پرس چھیننے والے ڈاکو کو دھکا دیا، تو وہ گر گیا، جس پر اس نے صائمہ پر فائرنگ کر دی۔‘‘ عرفان نے مطالبہ کیا کہ ڈاکوؤں نے 3 بچوں کی ماں کو قتل کیا ہے، ان کو پکڑ کر سخت سزا دی جائے۔
یاد رہے کہ رواں سال ڈاکوؤں کی فائرنگ سے جاں بحق شہریوں کی تعداد 26 ہو گئی ہے۔
