کراچی: کھارادر میں 6 منزلہ رہائشی عمارت کی چھت گرگئی ، تاہم خوش قسمتی سے کوئی جانی نقصان نہیں ہوا۔
تفصیلات کے مطابق کراچی کے علاقے کھارادر میں عمارت کا حصہ گرگیا , عمارتوں کے درمیان بنے کوریڈور کی چھت گری تو متعدد فلورز کی سیڑھیاں بھی گر گئیں۔
چھ منزلہ عمارت کی ٹنکی گرنے سے زینوں اور کوریڈور کو نقصان پہنچا، حادثے کے بعد بلڈنگ کی تیسری، چوتھی اور پانچویں منزل پرلوگ پھنس گئے جنہیں ریسکیو حکام ںے اسنارکل اورکرین کی مدد سے باہرنکالا۔
ریسکیو حکام کا کہنا ہے کہ عمارت میں تین یا چار خاندان رہتے تھے، متاثرہ عمارت پرانی اور خستہ حال ہے، جس کی وجہ سے گری۔
تنگ گلیوں اورعوام کے رش کے باعث امدادی کارروائیوں میں مشکلات کا سامنا ہے تاہم ب تک کسی جانی نقصان کی اطلاع نہیں ہے۔
ایس ایس پی سٹی عارف عزیز نے بتایا کہ پولیس اور دیگر اداروں نے ریسکیو آپریشن مکمل کرلیا ہے اور تمام افرادکواسنارکل کی مددسے بحفاظت نکال لیا گیا ہے۔
ایس ایس پی سٹی کا کہنا تھا کہ ہنگامی صورتحال سے نمٹنے کے لیے پولیس نفری کوتعینات کیاگیا، 6منزلہ عمارت کی بالائی تین منزلوں پر 22 افراد پھنس گئے تھے۔
دوسری جانب پیر کو راولپنڈی کے علاقےلال حویلی کے ایک قریب مکان کی چھت گر گئی، جس کے نتیجے میں چھ افراد دب کرزخمی ہو گئے۔
امدادی کاروائیاں جاری ہیں اور ملبے میں پھنسے چار افراد کو نکالا گیا موقع پر مرہم پٹی کی گئی جبکہ ملبے میں پھنسے مزید دو زخمیوں کو ہسپتال منتقل کر دیا گیا ہے۔
