کراچی میں شیر شاہ چوک کے قریب نامعلوم موٹر سائیکل سوار ملزمان کی فائرنگ سے ٹریفک پولیس اہلکار سمیت 2 افراد جاں بحق ہوگئے۔
ریسکیو حکام کے مطابق فائرنگ سے ٹریفک پولیس اہلکار کی شناخت خدا بخش جبکہ فائرنگ کی زد میں آکر جاں بحق ریڑھی بان کی شناخت غوث اللہ کے نام سے ہوئی۔
ایس ایس پی کیماڑی فیضان علی نے میڈیا سے گفتگو کرتے ہوئے کہا کہ واقعے سے متعلق مختلف اطلاعات سامنے آرہی ہیں واقعہ ڈکیتی ہے یا پھر ٹارگٹ، تحقیقات کررہے ہیں۔
ایس ایس پی کیماڑی کا کہنا ہے کہ ملزمان نے پولیس اہلکار کا اسلحہ چھینا اسی سے فائرنگ کردی، فائرنگ کی زد میں ریڑھی بان بھی آیا جو جاں بحق ہوا، جائے وقوعہ سے نائن ایم ایم کے چار خول تحویل میں لئے ہیں۔
فیضان علی نے کہا کہ کمانڈ اینڈ کنٹرول کے کیمراز سے فوٹیجز حاصل کی جارہی ہیں ریڑھی بان کا تعلق کوئٹہ سے ہے اطراف میں اب تک ڈکیتی کی کوئی واردات رپورٹ نہیں ہوئی کرائم سین انویسٹی گیشن یونٹ کی ٹیم موقع پر موجود ہے۔
