کراچی کے سول لائنز تھانے میں پولیس افسر کی خاتون سے بدتمیزی کی ویڈیو منظرعام پر آنے پر اسے معطل کردیا گیا۔
اے آر وائی نیوز کے مطابق کراچی کے سول لائنز تھانے میں تفتیشی افسر انسپکٹر عبدالرشید نے مبینہ طور پر نشے کی حالت میں خاتون سے بدتمیزی کی اور دھکے دے کر باہر نکالنے کی دھمکی دیتا رہا۔
ویڈیو میں واضح طور پر دیکھا جاسکتا ہے کہ تفتیشی افسر خاتون کو باہر نکالنے کی دھمکی دے رہا ہے۔
متاثرہ خاتون نے الزام لگایا کہ تفتیشی افسر تھانے میں نشے کی حالت میں بیٹھا ہوا تھا اس نے مجھے دھکے دے کر باہر نکالا کوئی پوچھنے والا نہیں ہے۔
خاتون کے مطابق ان کے بیٹے وقاص کو پولیس نے اسلحہ کے لائسنس سمیت پکڑا اور لائسنس پھاڑنے کے بعد اس پر غیرقانونی اسلحہ رکھنے کا مقدمہ درج کرلیا اور رہائی کے عوض ایک لاکھ روپے رشوت مانگی۔
متاثرہ خاتون کے بیٹے وقاص نے الزام عائد کیا کہ پولیس اہلکار نے نشے کی حالت میں تشدد کیا ہے۔
بعدازاں ڈی آئی جی ساؤتھ اسد رضا نے ایس آئی او سول لائنز عبدالرشید کو معطل کرتے ہوئے ایس ایس پی سٹی کو واقعے کی تحقیقات کا حکم دے دیا ہے۔
