کراچی: ایس آئی یو اور سی آئی اے نے مشترکہ کارروائی کے دوران دو دہشت گردوں کو گرفتار کرلیا ہے۔
ایس ایس پی ایس آئی یو نے میڈیا کو بتایا کہ کراچی کے علاقے نارتھ ناظم آباد میں ایس آئی یو اور سی آئی اے نے مشترکہ کارروائی کی۔
کارروائی کے دوران دو دوہشت گردوں کو گرفتار کیا گیا، دہشت گردوں کے قبضے سے بڑی تعداد میں دھماکا خیز مواد برآمد کیا گیا۔
انہوں نے بتایا کہ گرفتار دہشتگردوں سے ایک ہزار ڈیٹونیٹراوردو کوائل ڈیٹونیٹر وائر برآمد کئے گئے،گرفتار دہشت گرد دھماکا خیزمواد کو منتقل کررہےتھے، کارروائی کے دوران دہشت گردوں کا ایک ساتھی فرار ہونے میں کامیاب ہوگیا ہے۔
ایس ایس پی ایس آئی یو نے مزید بتایا کہ گرفتاردہشت گرد دھماکاخیزمواد کو منتقل کررہےتھے یہ دھماکہ خیزمواد پشاورسےلایا گیا تھا جسے شہر قائد میں دہشت گرد کارروائیوں میں استعمال کیاجاناتھا۔
یہ بھی پڑھیں: شمالی وزیرستان میں سی ٹی ڈی کی ٹیم پر حملہ، زیر حراست 3 ملزمان اور 4 دہشت گرد ہلاک
واضح رہے کہ آج شمالی وزیرستان میں سی ٹی ڈی کی ٹیم پر حملہ ناکام بنایا گیا تھا، دہشت گردوں کی فائرنگ سے زیر حراست تینوں ملزمان اور کالعدم تنظیم کے 4 دہشت گرد ہلاک ہوگئے تھے۔
سیکیورٹی ذرائع کے مطابق ہلاک دہشتگردوں کی شناخت ارشاداللہ،عبدالرحمان،مہردین کےنام سےہوئی، ملزمان سی ٹی ڈی کومتعدد سنگین دہشتگردی کے مقدمات میں مطلوب تھے۔
