کراچی کے علاقے گڈاپ میں قرض واپس مانگنے پر منہ بولے بیٹے نے خاتون کو قتل کردیا۔
اے آر وائی نیوز کے مطابق کراچی کے علاقے گڈاپ میں معمر خاتون کے اندھے قتل کا کیس حل ہوگیا پولیس نے واردات میں ملوث منہ بولے بیٹے کو گرفتار کرلیا۔
پولیس کا کہنا ہے کہ 6 دسمبر کو موٹروے کے قریب سے خاتون کی لاش برآمد ہوئی تھی۔
تفتیشی حکام کا بتانا ہے کہ 81 سالہ خاتون نے ملزم افتخار کو منہ بولا بیٹا بنایا ہوا تھا، ملزم نے کاروبار میں نقصان ہونے پر خاتون سے 20 لاکھ روپے لیے تھے۔
خاتون نے اپنے بیٹے کی شادی کے لیے ملزم سے پیسوں کی واپسی کا تقاضہ کیا تھا جس پر ملزم نے موقع پاکر کر خاتون کو قتل کردیا۔
واضح رہے کہ گزشتہ ماہ 6 دسمبر کو کراچی کے علاقے اورنگی ٹاؤن میں جائیداد کے تنازع پر بیٹوں نے ماں کو قتل کردیا تھا۔
پولیس نے بتایا تھا کہ ملزمان کا اپنی ماں سے جائیداد کے معاملے پر جھگڑا چل رہا تھا اور انہوں نے خاتون کو گلے میں رسی کا پھندا لگا کر قتل کیا۔
پولیس کے مطابق ملزمان مختار اور خلیل ماں کو قتل کرکے فرار ہوگئے، واردات کے بعد ملزمان کے بھائی کی مدعیت میں خاتون کے قتل کا مقدمہ درج کرلیا گیا اور ملزمان کی گرفتاری کے لیے چھاپے مارے جارہے ہیں۔
