کراچی: عوامی احتجاج پر کراچی ٹینکرز مالکان نے اپنے ٹینکرز بند کردیئے، ٹینکرز کی فراہمی معطل ہونے سے شہریوں کو مشکلات کا سامنا ہے۔
تفصیلات کے مطابق کراچی میں ہیوی ٹریفک کیخلاف احتجاج میں ٹینکرز کو آگ لگانے کے واقعات کے بعد واٹر ٹینکرز کی سپلائی بند ہوگئی۔
ٹینکر سروس بند ہونے سے مختلف علاقوں میں پانی کی شدید قلت پیدا ہوگئی ہے ، گزشتہ روز سے پانی کے ٹینکرز کی فراہمی معطل ہونے سے شہریوں کو مشکلات کا سامنا ہے۔
عوامی احتجاج پر کراچی ٹینکرز مالکان نے اپنے ٹینکرز بند کردیئے ہیں ، ،فوکل پرسن ہائیڈرینٹ شہباز بشیر کا کہنا ہے کہ 6ہائیڈرنٹس سے روزانہ 1500 ٹینکرز کی ترسیل بند ہے۔
شہباز بشیر نے کہا کہ واٹر ٹینکرز مالکان اور عملےنے خوف کے باعث کام سے انکار کردیا ہے۔
مزید پڑھیں: کراچی : نامعلوم افراد نے پیٹرول ڈال کر ایک اور واٹر ٹینکر کو آگ لگا دی
یاد رہے سرجانی ٹاؤن عبداللہ موڑ کے قریب نامعلوم افراد نے واٹر ٹینکر کو آگ لگا دی تھی ، موٹر سائیکل سوار 3 نامعلوم افراد نے واٹر ٹینکر کو روکا اور پیٹرول ڈال کے آگ لگائی۔
ڈرائیور نے ٹینکر سے چھلانگ لگا کر جان بچائی تاہم واقعے کی اطلاع ملتے ہی پولیس کی بھری نفری جائے وقوع پہنچ گئی ہے۔
خیال رہے آج صبح سات بجے سے ابتک چار ہیوی گاڑیوں کو آگ لگائی جا چکی ہے، پولیس کا کہنا تھا کہ لانڈھی ، کورنگی اور الکرم اسکوائر پر تین مال بردار ٹرکوں کو آگ لگائی گئی، لانڈھی میں جس ٹرک کو جلایا گیا اس پر چینی کی بوریاں اور عوامی کالونی میں جس ٹرک کو نقصان پہنچایا گیا اس پر سیمنٹ کی چادریں تھیں
