کراچی: شہر قائد میں جاری سندھ کے شہزادے ٹورنامنٹ کے فائنل میچ میں کراچی کی ٹیم نے حیدرآباد کو شکست دے کر ٹرافی اپنے نام کرلی۔
تفصیلات کے مطابق کراچی کے علاقے نیا ناظم آباد میں واقع اسٹیڈیم میں کراچی کنگز کے بینرز تلے ’سندھ کے شہزادے کرکٹ ٹورنامنٹ‘ کا فائنل میچ کراچی اور حیدرآباد کی ٹیموں کے مابین کھیلا گیا۔
حیدرآباد کی ٹیم نے پہلے بیٹنگ کرتے ہوئے مقررہ 20 اوورز میں 140 رنز بنائے اور کراچی کو جیت کے لیے 141 رنز کا ہدف دیا۔
کراچی کی ٹیم نے مقررہ ہدف 18.5 اوورز میں پانچ وکٹوں پر حاصل کر کے فتح اپنے نام کی۔ گورنر سندھ عمران اسماعیل، میئر کراچی وسیم اختر مہمان خصوصی تھے۔
Update of final match:#HomageKarachiKeShehzade has won the title of champions after beating #BridgePowerHyderabadKeShehzade by 5 wickets #SuperPowerKarachiKingsSindhKeShehzade tournament #2018 at #NayaNazimabad cricket ground, Karachi.
Stay connected for more updates pic.twitter.com/eSSqELucQ4
— Karachi Kings (@KarachiKingsARY) September 14, 2018
تقسیم انعامات کی تقریب میں بہترین فیلڈر کا ایوارڈ حارث علی خان کو دیا گیا، کراچی کی ٹیم کے محمد سلمان مین آف دی میچ قرار پائے جبکہ بہترین بلے باز کا ایوارڈ عماد عالم کے نام رہا۔
بعد ازاں ٹورنامنٹ کی اختتامی تقریب کا انعقاد بھی کیا گیا جس میں کراچی کنگز کے آفیشلز اور سی ای او محبوب عبدالرؤف نے بھی شرکت کی۔
سابق کپتان قومی کرکٹ ٹیم یونس خان نے کہا کہ سندھ کے نوجوانوں کو اچھا موقع ملا ہے، کراچی کے لوگ ایسے ایونٹ میں آئیں اور اسے سپورٹ کریں۔
سابق کپتان قومی کرکٹ ٹیم شاہد آفریدی نے کہا کہ کراچی اور حیدرآباد کی ٹیموں کو مبارکباد دیتا ہوں، اندرون سندھ کے بچوں میں کافی ٹیلنٹ ہے، پورے سندھ میں کرکٹ اکیڈمی ہونی چاہے، کراچی میں اس جیسا خوبصورت گراؤنڈ نہیں دیکھا۔
معروف کاروباری شخصیت عقیل کریم ڈھیڈھی نے کہا کہ کھیلوں کو فروغ ملتا رہا تو بچوں کو سہولتیں میسر ہوں گی، کراچی کنگز کے مالک سلمان اقبال کی کاوش کو سراہتے ہیں۔
میئر کراچی وسیم اختر نے ٹورنامنٹ کے انعقاد پر سلمان اقبال کو خصوصی مبارک باد دی۔ اُن کا کہنا تھا کہ کھیلوں کے فروغ کا سلسلہ جاری رہنا چاہیے، بلدیاتی حکومت اور ادارے اس طرز کے ٹورنامنٹ کے انعقاد میں اپنا کردار ادا کرنے کو تیار ہیں۔
گورنر سندھ عمران اسماعیل کا کہنا تھا کہ ایسے ایونٹس دیکھ کر بہت خوشی ہوتی ہے، اُن تمام لوگوں کا شکریہ جنہوں نے ٹورنامنٹ کا انعقاد کیا، اس ایونٹ کی بدولت کراچی کے شہزادوں کا سفر سندھ تک پہنچ گیا۔
اُن کا کہنا تھا کہ سندھ کے نوجوانوں کو کھیلوں کیلئے سہولتیں میسر نہیں ، نوجوان کھلاڑی ہار نہ مانیں ہم اپنی پوری کوشش کریں گے، کم وسائل کے باوجود نوجوانوں نے بہت اچھا کھیل پیش کیا۔
Closing Ceremony of #SuperPowerKarachiKingsSindhKeShehzade #2018 Naya Nazimabad Cricket Ground. #KarachiKings https://t.co/Taxylu0I58
— Karachi Kings (@KarachiKingsARY) September 14, 2018
ٹورنامنٹ کے انعقاد کا مقصد سندھ بھر سے باصلاحیت کھلاڑیوں کو سامنے لانا تھا۔ ایونٹ میں کراچی، حیدرآباد، سکھر، نوابشاہ، میرپورخاص کی ٹیمیں شامل تھیں جبکہ 75 کھلاڑیوں نے اپنی صلاحیتوں کے جوہر دکھائے۔
