کراچی: شہر قائد کے شہریوں کے سر پر منڈلاتا ہیٹ ویو کا خطر ہ ٹل گیا ہے تاہم خلیج ِ بنگال میں ہوا کے کم دباؤ کے سبب آئندہ چار دن تک شہر کا موسم گرم رہنے کا امکان ہے۔
ڈائریکٹر محکمہ موسمیات عبدالرشید نے میڈیا سے بات کرتے ہوئے بتایا ہے کہ 22 سے 26 ستمبر تک کراچی کا درجہ حرارت بڑھنےکا امکان ہے، شہر میں آج بھی سمندری ہوائیں بند رہیں گی جس کے سبب درجہ حرارت میں اضافہ ہوسکتا ہے۔
محکمہ موسمیات کے مطابق کل سے چار دن تک خلیج بنگال میں ہوا کے کم دباؤ کے باعث شدید گرمی کی لہر شہر قائد کو لپیٹ میں لے لے گی۔ان کا کہنا تھا کہ گرمی بڑھنےکی وجہ خلیج بنگال میں ہوا کاکم دباؤ ہے، درجہ حرارت میں اضافہ ہواؤں کی سمت تبدیل ہونےکی وجہ سے ہوگا، تاہم تازہ اطلاع کے مطابق آج شام تک شہر میں سمندری ہوائیں چلنا شروع ہوجائیں گی جس کے سبب ہیٹ ویو کا خطرہ پیدا نہیں ہوگا۔
انہوں نے کہا کہ کراچی میں ہفتے اور اتوار کو پارہ 38 ڈگری کو چھوسکتا ہے البتہ 26 ستمبر کے بعد گرمی میں کمی آنا شروع ہوجائے گی خلیج بنگال میں بننےوالاہواکاکم دباؤ مدھیہ پردیش اورمغربی راجھستان میں ہے، شہر میں بارشوں کا کوئی نیا سسٹم داخل نہیں ہورہا ہے۔
یاد رہے کہ وزیراعلیٰ سندھ مراد علی شاہ نے شہر میں ممکنہ شدید گرمی کے اندیشے کے سبب ’کے الیکٹرک‘ کو بھی ہدایت کی ہے کہ شدید گرمی میں شہریوں کو بلا تعطل بجلی فراہم کی جائے، انھوں نے واٹر بورڈ کو حکم دیا ہے کہ شہریوں کو پانی کی فراہمی کا نظام مزید بہتر کرے۔
