کراچی : جوڑیا بازار کی ہول سیل مارکیٹ کے تاجروں نے چینی کی ایکسپورٹ پر تین ماہ کیلئے پابندی لگانے کا مطالبہ کر دیا۔
تفصیلات کے مطابق کراچی میں ریٹیل سطح پر چینی کی قیمتیں 160 روپے فی کلو تک پہنچ گئیں۔
چیئرمین ہول سیل گروسرز ایسوسی ایشن رؤف ابراہیم نے مطالبہ کیا ہے کہ حکومت3ماہ کیلئےچینی ایکسپورٹ پر پابندی عائد کرے۔
رؤف ابراہیم کا کہنا تھا کہ ہول سیل بازارمیں چینی کی قیمت 150 روپے تک پہنچ گئی، مارکیٹ میں ذخیرہ مافیا سرگرم ،مارچ کے ایڈوانس سودے ہو رہے ہیں۔
چیئرمین ہول سیل گروسرز نے کہا کہ چینی کے مارچ کےایڈوانس سودے152روپے فی کلوتک پہنچ گئے، رمضان میں چینی کی قیمتوں میں ہوشربا اضافے کا خدشہ ہے۔
مزید پڑھیں : ملک میں چینی کی فی کلو قیمت 160 روپے تک جا پہنچی
ان کا کہنا تھا کہ ملک بھر میں چینی کی ماہانہ کھپت ساڑھے 5لاکھ ٹن ہے، رمضان میں یہ کھپت 10لاکھ ٹن پہنچ جاتی ہے۔
رؤف ابراہیم نے بتایا کہ دسمبر سے چینی کی قیمتوں میں 26 روپے کلو کا اضافہ ہوچکا ہے جبکہ گزشتہ سال بھی منافع خوروں نے چینی کی قیمت 180 روپے پر پہنچا دی تھی۔
خیال رہے یوٹیلٹی اسٹورزپربھی چینی 5 روپےاضافے سے145 روپے فی کلو پر پہنچ گئی ہے۔
