کراچی میں شہری نے ٹریفک پولیس اہلکار کو رشوت دینے کی مبینہ ویڈیو بنالی۔
اے آر وائی نیوز کے مطابق کراچی کے علاقے سرجانی فور کے چورنگی پر ٹریفک پولیس اہلکار نے موٹر سائیکل سوار کو روکا، ہیلمٹ نہ پہننے اور فینسی نمبر پلیٹ پر چالان کرنے کی دھمکی دی۔
شہری نے ٹریفک اہلکار کو 200 روپے رشوت دی اور اس کی ویڈیو بھی بنالی۔
ویڈیو میں دیکھا جاسکتا ہے کہ شہری ٹریفک پولیس اہلکار کو 500 روپے دیتا ہے اور پھر وہ اسے 300 روپے واپس کرکے 200 روپے رکھ لیتا ہے۔
قانون کے مطابق بغیر ہیلمٹ موٹر سائیکل چلانے اور فینسی نمبر پلیٹ کا جرمانہ 1500 روپے بنتا ہے۔
بعدازاں ڈی آئی جی ٹریفک نے واقعے کا نوٹس لیتے ہوئے ایس ایس پی سینٹرل کو حکم دیا کہ اہلکار کو فوری طور پر معطل کرکے تحقیقات کی جائیں۔
واضح رہے کہ کراچی کے مختلف علاقوں میں ٹریفک پولیس اور پولیس کی جانب سے فینسی نمبر پلیٹ والی گاڑیوں اور موٹر سائیکلیں استعمال کرنے والوں کے خلاف کارروائیاں جاری ہیں۔
چند روز قبل سندھ حکومت نے فینسی نمبر پلیٹ، کالے شیشوں والی گاڑیوں اور اسلحے کی نمائش کرنے والوں کے خلاف کریک ڈاؤن کا فیصلہ کیا تھا۔
چیف سیکریٹری سندھ آصف حیدر شاہ کی زیرِ صدارت امن و امان سے متعلق اجلاس میں فینسی نمبر پلیٹ اور کالے شیشوں والی گاڑیوں پر کارروائی کی ہدایت کی گئی تھی۔
