کراچی: شہرقائد کی ٹریفک پولیس اہلکارعوام کی سہولت کو مدنظررکھتے ہوئے سڑکوں پر موجود گڑھے از خود ہی بھرنے لگے، سڑکوں پر موجود یہ گڑھے آئے دن حادثات کا سبب بنتے ہیں۔
تفصیلات کے مطابق کراچی کے علاقے سلطان آباد کے این ایل سی چوک پر ٹریفک کی روانی کو برقرار رکھنے کے لیے پولیس نے اپنی مدد آپ کے تحت ان گڑھو ں کوبھرا تاکہ شہری محفوظ سفر کرسکیں۔
ایس ایس پی ویسٹ ڈاکٹر نجیب کے مطابق پولیس اہلکاروں نےیہ کام ازخود انجام دیا اور گڑھے پر کرنے کا مقصد حادثات کی روک تھا م اور ٹریفک کی روانی کو بحال رکھنا ہے۔
انہوں نے بتایا کہ ان گڑھوں کے سبب آئے دن شہرقائد میں حادثات پیش آتے ہیں ۔ رواں اور محفوظ سڑکیں ہی شہریوں کے محفوظ سفر کی اولین ضمانت ہوتی ہیں۔ ڈاکٹر نجیب کے مطابق کچھ روز قبل سب میرین ہائی وے پر بھی ایک گاڑی گڑھے میں گرگئی تھی جس کے نتیجے میں دو افراد شدید زخمی ہوئے تھے۔
اسی نوعیت کے واقعات کی روک تھا م کے لیے این ایل سی چوک پر متعین ٹریفک اہلکاروں نے ازخود ان گڑہوں کو بھرنے کا فیصلہ کیا جوکہ قابلَ ستائش اقدام ہے، اسی نوعیت کے اقدامات سے عوام اور پولیس کے درمیان اختلافات ختم ہوں گے اور بہتر پولیسنگ میں مدد ملے گی۔
