کراچی: جامعہ کراچی میں پی ایچ ڈی لا پر پابندی کیس میں عدالت نے فریقین کو نوٹس جاری کر دیا۔
تفصیلات کے مطابق سپریم کورٹ کراچی رجسٹری میں کراچی یونیورسٹی میں پی ایچ ڈی لا پر پابندی کے کیس میں طلبہ نے پابندی کے خلاف درخواست دائر کی ہے، اور کہا ہے کہ پی ایچ ڈی/ ایل ایل ایم پر پابندی سے ان کے کئی سال متاثر ہوں گے، جس پر عدالت نے فریقین کو نوٹس جاری کر دیے۔
درخواست گزار نے عدالت میں مؤقف اختیار کیا ہے کہ ہائر ایجوکیشن کمیشن (ایچ ای سی) کی رپورٹ پر سال 2014 سے 2020 تک داخلے خلاف ضابطہ قرار دیے گئے ہیں، جب کہ اس عرصے کے دوران داخلے انٹرویو بیسڈ تھے، جب ٹیسٹ شرط ہی نہیں تھا تو اس بنیاد پر داخلے کیوں خلاف ضابطہ قرار دیے گئے۔
عدالت کو فریق مخالف کی جانب سے بتایا گیا کہ پرانے داخلوں کو خلاف ضابطہ اور نئے داخلوں پر پابندی عدالتی فیصلے پر لگائی گئی، ہائی کورٹ نے ایچ ای سی کی رپورٹ پر یہ پابندی عائد کی تھی، ایچ ای سی رپورٹ کے مطابق ایل ایل ایم اور پی ایچ ڈی کے داخلے میں ٹیسٹ نہیں ہوئے، طلبہ کو پی ایچ ڈی کرانے کے لیے میسر اساتذہ بھی درکار قابلیت پر پورا نہیں اترتے۔
عدالت نے کیس کی سماعت کے بعد فریقین کو نوٹسز جاری کر دیے، اور سماعت ملتوی کر دی۔
ادھر سندھ ہائیکورٹ میں اردو فیڈرل یونیورسٹی میں فیسوں کے اضافے کے کیس میں عدالت نے طالب علم مزمل کی درخواست پر فریقین کو نوٹس جاری کر تے ہوئے آئندہ سماعت پر فریقین سے جواب طلب کر لیے ہیں۔
درخواست گزار کے مطابق اردو فیڈرل یونیورسٹی کے شعبہ قانون کی فیسوں میں 50 فی صد اضافہ کیا گیا ہے، جب کہ قانون کے مطابق سالانہ زیادہ سے زیادہ 10 فی صد اضافہ ہو سکتا ہے، عدالت نے درخواست گزار سے استفسار کیا کہ کوئی نوٹیفکیشن یا آرڈر ہے فیسوں کے اضافے سے متعلق، وکیل درخواست گزار نے کہا کہ نوٹیفیکیشن نہیں زبانی کہا گیا ہے۔
عدالت نے کہا کہ زبانی کلامی کے معاملات پر کیسے نوٹس کر سکتے ہیں، درخواست گزار کا کہنا ہے کہ اردو فیڈرل یونیورسٹی نے دیگر شعبوں کے فیسوں میں اضافہ کیا ہے، فیسوں کے اضافے سے غریب طلبہ کے لیے مشکلات میں اضافہ ہوا ہے۔
