بغدادی پولیس نے مبینہ مقابلے کے بعد گینگ وار وصی اللہ لاکھو گروہ کے کارندے شجاع کو زخمی حالت میں گرفتار کرلیا۔
تفصیلات کے مطابق کراچی میں بغدادی پولیس نے مقابلے کے بعد گینگ وار ملزم شجاع کو گرفتار کرلیا، ملزم گینگ وارکمانڈر وصی اللہ لاکھو گینگ کا اہم کارندہ نکلا ہے جبکہ مقابلے کے دوران وصی اللہ لاکھو کا بھائی طارق لاکھو فرار ہوگیا۔
ایس ایس پی سٹی امجد حیات کے مطابق ملزم شجاع نے ساتھیوں کے ساتھ کئی سنگین وارداتیں کیں، اور بھتہ نا دینے پر متعدد افراد کو قتل کیا، جون 2023 میں بلڈر ریاض کو اور جولائی 2023 میں سلمان کو قتل اور عدنان کو زخمی کیا۔
حکام نے بتایا کہ شجاع کا ساتھی قادر اور شکیل جیل جا چکے ہیں، ملزم کے خلاف دہشتگردی اور ایکسپلو سو ایکٹ کے تحت بھی کئی مقدمات ہیں۔
ایس ایس پی سٹی نے بتایا کہ دوران تفتیش ملزم نے شہریوں کے اغوا اور قتل کا بھی انکشاف کیا، ملزم کھاردار اور اولڈ سٹی ایریا میں تاجروں کو بھتے کی پرچیاں بھی دیتا تھا، جبکہ ملزم سے مزید تفتیش جاری ہے۔
