کراچی: صوبہ سندھ کے دارالحکومت کراچی میں آج موسم گرم اور مرطوب رہے گا، محکمہ موسمیات نے اگلے ہفتے بارشوں کی پیش گوئی کی ہے۔

تفصیلات کے مطابق کراچی میں آج درجہ حرارت 36 سے 38 ڈگری سینٹی گریڈ تک جانے کا امکان ہے، محکمہ موسمیات کا کہنا ہے کہ آج موسم گرم اور مرطوب رہے گا۔

شہر میں آج جنوب مغربی سمت سے ہواؤں کی رفتار 26 کلو میٹر فی گھنٹہ ہے جبکہ ہوا میں نمی کا تناسب 60 فیصد ہے۔

محکمہ موسمیات نے شہر میں بارشوں کی بھی پیش گوئی کردی ہے، محکمہ موسمیات کے مطابق کراچی میں اگلے ہفتے سے مون سون بارشوں کے سلسلے کا آغاز ہوگا۔

ڈائریکٹر محکمہ موسمیات کا کہنا ہے کہ 6 سے 8 جولائی کو درمیانے درجے کی بارشیں ہو سکتی ہیں، رواں سال معمول سے 10 فیصد زیادہ بارشیں متوقع ہیں۔

محکمہ موسمیات کے مطابق بارشوں سے شہر میں گرمی کی شدت میں کمی ہونے کا امکان ہے۔