کراچی: محکمہ موسمیات کا کہنا ہے کہ صوبہ سندھ میں کل سے 26 جولائی تک مون سون بارشوں کا سلسلہ جاری رہے گا، شہر کراچی میں بھی گرج چمک کے ساتھ موسلا دھار بارش کا امکان ہے۔

تفصیلات کے مطابق محکمہ موسمیات نے کل سے مون سون بارشوں کی پیش گوئی کردی، محکمہ موسمیات کا کہنا ہے کہ اندرون سندھ میں 23 جولائی سے بارشوں کا سلسلہ شروع ہوگا جبکہ کراچی میں 24 جولائی سے بارشوں کا سلسلہ شروع ہوگا۔

محکمہ موسمیات کے مطابق ہوا کا کم دباؤ بھارتی راجھستان سے ہوتا ہوا کل صبح سندھ میں داخل ہوگا، جمعہ کی صبح سے بالائی سندھ میں بارشوں کا آغاز ہوگا۔ جمعہ کی رات تک ہوا کا دباؤ کراچی اور حیدر آباد پہنچے گا۔

کراچی میں کل رات سے 26 جولائی تک گرج چمک کے ساتھ موسلا دھار بارش کا امکان ہے، بارش سے قبل تیز گرد آلود ہوائیں بھی چلیں گی۔