کراچی: محکمہ موسمیات نے کراچی کے موسم کے حوالے سے شہریوں کو خبردار کردیا ہے۔
تفصیلات کے مطابق محکمہ موسمیات کی جانب سے بیان میں کہا گیا ہے کراچی میں آج حبس کی کیفیت کے ساتھ موسم گرم اور مرطوب رہے گا، دن میں سمندری ہوائیں جزوی طور پر بند رہیں گی۔
محکمہ موسمیات کا کہنا ہے کہ شہر کا زیادہ سے زیادہ درجہ حرارت 38 ڈگری تک جانے کا امکان ہے جبکہ آج سے 2 روز تک درجہ حرارت میں اضافہ متوقع ہے۔
محکمہ موسمیات کا مزید بتانا ہے کہ شہر کی ہوا میں نمی زیادہ ہونے سے دن میں گرمی کی شدت زیادہ محسوس کی جاسکتی ہے، جنوب مغرب سے ہوا 12 کلو میٹر فی گھنٹہ کی رفتار سے چل رہی ہے۔
مزید پڑھیں : کراچی میں 27جون سے بارشیں
دوسری جانب محکمہ موسمیات نے شہرِ قائد کے شہریوں کو خوشخبری سناتے ہوئے کہا ہے کہ کراچی میں 27 جون سے بارشوں کا امکان ہے، جس کے باعث رین ایمرجنسی نافذ کردی گئی ہے۔
محکمہ موسمیات نے بتایا کہ کراچی میں نہ صرف 27 جون کو بادلوں کے برسنے کا امکان ہے بلکہ 28 اور 29 جون کو شہر میں بارش کا امکان زیادہ ہے، کراچی میں 27 سے 29 جون کے دوران تیز اور معتدل بارش متوقع ہے۔
محکمہ موسمیات نے بتایا کہ مون سون کا سسٹم 25 جون کو ملک کے بالائی علاقوں پر اثرانداز ہوسکتا ہے، 26 جون سے سسٹم سندھ پر اثرانداز ہونا شروع ہوگا۔
