کراچی کے مختلف علاقوں میں صبح سویرے بوندا باندی کے بعد موسم خوشگوار ہوگیا، بوندا باندی اور ہوائیں چلنے سے گرمی کی شدت کم ہوئی ہے
محکمہ موسمیات کے مطابق لیاری، ماڑی پور روڈ، کلفٹن سمیت اطراف کے علاقوں میں بوندا باندی ہوئی ہے جبکہ اب بھی شہر میں کراچی میں بادلوں کے ڈیرے اور مطلع ابر آلود ہے۔
محکمہ موسمیات کے مطابق شہر کا موسم ابرالود رہے گا جبکہ دن کے اوقات اور کل بھی بوندا باندی کا امکان ہے اس کے علاوہ آئندہ 24 گھنٹے کے دوران مطلع جزوی ابر آلود رہنے کے ساتھ تیز ہوائیں چلنے کا سلسلہ جاری رہے گا۔
محکمہ موسمیات کا کہنا ہے کہ شہر میں آج درجہ حرارت 36 ڈگری سینٹی گریڈ تک رہنے کا امکان ہے اور ہوا میں نمی کا تناسب 75 فیصد ہے، جنوب مغربی سمت سے 10 کلو میٹر فی گھنٹہ کی رفتار سے ہوائیں چل رہی ہیں۔
دوسری جانب شہر اقتدار میں بھی بادلوں نے رنگ جمادیا، راولپنڈی اسلام آباد میں صبح سویرے بارش سے موسم خوشگوار ہوگیا۔
محکمہ موسمیات نے آج سے ملک کے مختلف حصوں میں پری مون سون بارشوں کی پیش گوئی کی ہے، پنجاب، خیبرپختونخوا، گلگت بلتستان اور کشمیر میں آج سے تین دن تک بارش کا امکان ہے، سندھ میں کئی مقامات پر کل سے گرج چمک کے ساتھ بارشیں متوقع ہے۔
