کراچی : محکمہ موسمیات نے خبردار کیا ہے کہ اس بار مون سون میں ماضی کے مقابلے زیادہ بارشوں کا امکان ہے، آج کراچی میں مطلع ابرآلود رہے گا اور دن میں ہلکی بارش کا امکان ہے۔
کراچی والے تیار ہوجائیں تیار!! اس سال بھی شہر میں مون سون بارشیں معمول سے زیادہ اور زبردست ہونے جارہی ہیں. عموماً مون سون کا آغاز کراچی میں جولائی کے دوسرے یا تیسرے ہفتے ہوتا ہے مگر اس بار مون سون سیزن کا آغاز کراچی میں جولائی کے پہلے ہفتے سے ہوگا۔
موسم کا حال بتانے والوں کا کہنا ہے کہ آج بروز ہفتہ شہر قائد میں مطلع ابرآلود رہے گا اور دن میں ہلکی بارش کا امکان ہے، کراچی کا موجودہ درجہ حرارت 31 ڈگری سینٹی گریڈ ریکارڈ کیا گیا ہے۔
محکمہ موسمیات کے مطابق دن میں درجہ حرارت 35 سے 37 ڈگری تک رہنے کا امکان ہے جبکہ دن کے اوقات میں ہوا 35 سے 40 کلومیٹر فی گھنٹہ کی رفتار سے چلے گی۔
کراچی میں پری مون سون بارشوں کا سیزن چل رہا ہے، جولائی کے پہلے ہفتے سے مون سون کا آغاز ہوگا، محکمہ موسمیات کا کہنا ہے کہ مون سون میں ماضی کے مقابلے زیادہ بارشوں کا امکان ہے۔
