بالی ووڈ میں ’بیبو‘ کے نام سے مشہور معروف اداکارہ کرینہ کپور نے کہا ہے کہ ماں کی محبت کی مخصوص زبان نہیں یہ ایک خوبصورت احساس ہوتا ہے۔
بالی ووڈ اداکارہ کرینہ کپور اپنی نئی فلم ’’دی بکنگھم مڈررس ‘‘ کی پروموشن میں مصروف ہیں، اس فلم کی ہدایتکاری ہنسل مہتا نے انجام دیئے ہیں، فلم میں کرینہ کپور نے جسمیت بھمرا عرف جیس کا کردار نبھایا ہے۔
گزشتہ روز اداکارہ کرینہ کپور نے فلم کے ٹریلر کے لانچ کی تقریب میں شرکت کے بعد فلم میں اپنے کردار کے تعلق سے بات چیت کی، جہاں انہوں نے بتایا کہ کس چیز نے فلم میں انہیں اپنے کردار سے جوڑے رکھا۔
کرینہ نے میڈیا سے بات کے دوران کہا کہ مجھے لگتا ہے کہ ماں کی محبت کی کوئی زبان نہیں ہوتی، یہ ایک خوبصورت احساس ہوتا ہے۔ میں چونکہ ایک ماں ہوں اس لئے سمجھتی ہوں کہ ماں کی محبت کی مخصوص زبان نہیں ہوتی۔
اداکارہ کا کہنا تھا کہ ماں کی آنکھوں ہی میں اس کی محبت اور اس کا درد نمایاں ہوتا ہے، اس رشتے کی اہمیت یہ ہے کہ ایک ماں کی آنکھیں سب کچھ بیان کر دیتی ہیں۔
کرینہ کپور نے مزید کہا کہ مجھے لگتا ہے کہ اسی چیز نے فلم میں مجھے اپنے کردار سے جوڑے رکھا، مجھے لگا کہ یہی صحیح وقت ہے اس کردار کو محسوس کرنے کا اور فلم کے کردار کو بخوبی نبھانے کا۔
خیال رہے کہ اس فلم میں رنویر برار اور کیتھ ایلن نے کلیدی کردار ادا کئے ہیں، فلم کو ایکتا کپور، شوبھا کپور اور کرینہ کپور نے بالاجی ٹیلی فلمز اور ٹی بی ایم فلمز کے تحت پروڈیوس کیا ہے، فلم 13 ستمبر کو سنیما میں ریلیز کی جائے گی۔
