کراچی: گینگ وار کمانڈر کاشف سندھی کے منشیات کے اڈے پر ٹارگٹڈ آپریشن کے دوران اس کے فرنٹ مین کو گرفتار کر لیا گیا۔
تفصیلات کے مطابق رات گئے ضلع کیماڑی پولیس نے پرانا گولیمار میں گینگ وار کمانڈر کاشف عرف سندھی کے منشیات کے اڈے پر ایک ٹارگٹڈ آپریشن کیا۔
ایس ایس پی کیماڑی کیپٹن (ر) فیضان علی کے مطابق آپریشن میں کاشف سندھی کا فرنٹ مین آصف ولد فقیر محمد بھاری مقدار میں منشیات و اسلحہ سمیت پکڑا گیا، گرفتار ملزم قتل، اقدام قتل، منشیات فروشی و گینگ وار سرگرمیوں میں ملوث ہے۔
ملزم آصف کے قبضے سے 6 عدد پستول، 30 راونڈز، 2 کلو چرس پیکٹ، کرسٹل اور چرس کی درجنوں پڑیاں، ترازو، پسٹل کے تین عدد بیلٹ اور 20 ہزار روپے کیش برآمد ہوا۔
بڑا ڈکیت گینگ آپریٹ کرنے والا فہیم شوٹر زخمی حالت میں گرفتار
یہ کارروائی انچارج اینٹی اسٹریٹ کرائم سیل سب انسپکٹر راجہ خالد محمود اور ایس ایچ او پاک کالونی انسپکٹر چوہدری جاوید اختر نے پولیس کی بھاری نفری کے ہمراہ کی۔
گرفتار ملزم کا سابقہ کریمنل ریکارڈ بھی نکال لیا گیا ہے، ملزم پر پاک کالونی تھانے میں 3 جب کہ شرافی گوٹھ تھانے میں ایک مقدمہ درج ہے۔ پاک کالونی تھانے میں ملزم کے خلاف ایک اور مقدمہ درج کر کے مزید تفتیش کی جا رہی ہے۔
