مانچسٹر : وزیراعظم کے معاون خصوصی اور پی ٹی آئی رہنما نعیم الحق نے کہا ہے کہ مودی سرکار مسئلہ کشمیر پر مذاکرات سے انکاری ہے، عالمی طاقتوں نے اقدامات نہ کیے تو اقوام متحدہ اور عالمی برادری خطے کی تباہی کے ذمہ دار ہوں گے۔
یہ بات انہوں نے مانچسٹر میں میڈیا سے گفتگو کرتے ہوئے کہی، نعیم الحق نے کہا کہ مقبوضہ کشمیر پولیس اسٹیٹ بن چکا ہے، عالمی طاقتوں نے بروقت اقدامات نہ کیے تو کشمیری عوام ایل اوسی توڑ سکتے ہیں۔
پی ٹی آئی رہنما کا مزید کہنا تھا کہ مودی سرکار مسئلہ کشمیر پر مذاکرات سے مسلسل انکار کررہا ہے، عالمی طاقتوں نے جلد اور مؤثر اقدامات نہ کیے تو عالمی برادری اور اقوام متحدہ خطے کی تباہی کے ذمہ دار ہوں گے۔
انہوں نے مزید کہا کہ حکومت نے تہیہ کر لیا ہے کہ مسئلہ کشمیر کو ہر صورت حل کرنا ہے، وزیراعظم عمران خان سعودی ولی عہد سے ملاقات کرکے انہیں مسئلہ کشمیر کی سنگینی صورتحال سے آگاہ کریں گے، دھرنے کی صورت میں حکومت آئین و قانون کے مطابق اقدامات کرے گی۔
